Një zhvillim i rëndësishëm po merr formë në zonën e Liqenit të Prespës: për herë të parë, në fshatin Zaroshkë të Bashkisë Pustec do të ndërtohet një plazh publik me kapacitet deri në 3000 pushues.
Lajmin e ka bërë publik kryetari i bashkisë, Pali Kolevski, i cili theksoi se projekti nuk do të përfshijë vetëm hapësira plazhi, por edhe objekte shërbimi dhe argëtimi të përshtatura si për pushuesit vendas, ashtu edhe për ata të huaj.
Plazhi do të jetë i pajisur me të gjitha kushtet higjieno-sanitare, duke përfshirë dushe, tualete, kabina ndërrimi dhe sistem sigurie për pushuesit. Gjithashtu, do të ofrohen ambiente relaksi, sporte ujore, si edhe hapësira për freskime dhe ushqime të lehta.
Sipas Kolevskit, ky investim synon ta shndërrojë Zaroshkën në një nga destinacionet më atraktive turistike të Prespës, duke pasuruar ofertën për turizëm familjar dhe natyror në këtë zonë me bukuri të veçanta.
Pusteci po konsolidohet gjithnjë e më shumë si një destinacion që ndërthur natyrën, kulturën dhe zhvillimin e qëndrueshëm.
