Në qytetin buzë liqenit, ku sporti dhe natyra kanë bashkëjetuar gjithmonë në harmoni, tradita e notit vijon të ruhet dhe të përcillet brez pas brezi.
Gati 84 vite më parë, në gushtin e vitit 1941, Pogradeci priti Kampionatin Kombëtar të Notit, ku të rinjtë e njohur në atë kohë si “Rinia Shqiptare e Liktorit” garonin në ujërat e kristalta të liqenit të Ohrit. Pamjet arkivore të këtij aktiviteti, të ruajtura në Arkivin “LUCE”, janë dëshmi e hershme e lidhjes së qytetit me sportin e notit.
Sot, në korrik 2025, po në të njëjtin qytet dhe në të njëjtat ujëra, zhvillohet Kampionati i Notit për grupmoshat e reja, duke dëshmuar se Pogradeci mbetet një qendër natyrore e këtij sporti në vend.
Të rinj nga qytete të ndryshme të Shqipërisë vijnë për të garuar në kushte të përsosura natyrore, nën sytë e trajnerëve dhe familjarëve që përkrahin çdo të notuar drejt së ardhmes.
Në një kohë kur shumë tradita zbehen, noti në Pogradec mbetet i gjallë, duke bashkuar historinë me energjinë e brezit të ri.
