Policia Kufitare dhe Njësia Policore Detare kanë ndërhyrë në një rast shkeljeje të sigurisë ujore në zonën turistike “Guri i Kuq”, duke ndëshkuar një drejtues mjeti lundrues me masë administrative.
Gjatë patrullimeve të përbashkëta për garantimin e rendit dhe sigurisë në vijën bregdetare të liqenit, u konstatua një varkë metalike që lundronte në afërsi të pushuesve, duke shkelur perimetrin e sigurisë ujore.
Shërbimet policore ndaluan mjetin dhe ndëshkuan drejtuesin e tij, shtetasin E. B., me një gjobë prej 100 000 lekësh, në bazë të nenit 24/1/c të ligjit nr. 43/2020 “Për zhvillimin e aktiviteteve jashtë zonave të kufizuara”. Mjeti u bllokua menjëherë.
Policia Kufitare apelon për të gjithë përdoruesit e mjeteve lundruese që të respektojnë me përpikëri rregullat e sigurisë dhe zonat e përcaktuara për lundrim, me qëllim mbrojtjen e jetës dhe mirëqenies së pushuesve.
Gjithashtu, fton qytetarët të denoncojnë çdo rast shkeljeje në numrin 112, duke garantuar një reagim të shpejtë dhe të vendosur.
