Me ardhjen e sezonit turistik dhe shtimin e fluksit të vizitorëve, Policia Bashkiake e Pogradecit ka hartuar një plan masash për të menaxhuar trafikun dhe parkimet në qytet. Autoritetet u bëjnë thirrje banorëve vendas të pajisen me kartën e rezidentit të parkimit dhe të shmangin parkimin e automjeteve në zonat me numër të lartë turistësh, për të mos krijuar ngarkesë në lëvizjen rrugore.
Markel Hafesllari, drejtues i Agjencisë së Mbrojtjes së Territorit pranë Bashkisë së Pogradecit, theksoi rëndësinë e mikpritjes së vizitorëve dhe kërkoi nga qytetarët që gjatë sezonit të kufizojnë lëvizjet e panevojshme me automjete, si dhe të parkojnë brenda lagjeve të tyre, për të shmangur kaosin në qarkullim.
Ndërkohë, Policia Bashkiake ka shtuar patrullimet në terren, duke zbatuar një plan të posaçëm për të garantuar sigurinë e pushuesve dhe mbarëvajtjen e një sezoni të qetë turistik.
Gjatë një muaji, në të gjithë qarkun e Pogradecit janë vendosur gjithsej 1174 masa administrative. Institucionet lokale vijojnë thirrjet për bashkëpunim dhe mirëkuptim nga qytetarët në këtë periudhë të ngarkuar të vitit.
