Qyteti liqenor apo Lasgushian siç e cilësojnë, nuk tërheq vetëm pushues me qetësinë dhe bukurinë e tij.
Tradicionalisht ky qytet me liqenin më unikal në botë ka frymëzuar piktorët e poetët.
Në gjirin e tij qyteti numëron me dhjetra piktorë në zë dhe poetë, por frymëzimi i tij shkon edhe përtej qytetit. Janë të shumtë artistët dhe piktorët që thonë se Pogradeci frymëzon dhe është e pamundur që natyrën e tij të mos ta hedhësh në telajo.
Vetëm në javën e fundit në qytet janë çelur dy ekspozita pikturash me peizazhe nga ky qytet. Piktori elbasanas Sadik Kasa zgjodhi që të sjellë ekspozitën e tij “Stinët” në Pogradec, pasi sipas tij qyteti të ofron gjithçka në çdo stinë.
Ndërkohë një tjetër ekspozitë e cila ka në fokus liqenin, mjelmat, natyrën, dimrin, vjeshtën në këtë qytet e jovetëm u çel nga piktori Gëzim Begolli, një devolli që Pogradeci e tërhoqi për të jetuar në gjirin e tij, e që e frymëzon ndër vite që ta pikturojë atë.
Në Pogradec janë me dhjetra ekspozita vjetore personale deri edhe tek kolonitë ndërkombëtare të cilat zhvillohen, deri tek mbrëmjet poetike të autorëve të ndryshëm shqiptarë e të huaj. Jo rastësisht ky qytet ka Lasgushin dhe Mitrushin si njerëz të letrave dhe Tason e Lakon si piktorë të mirënjohur.
