Drejtoria Vendore e Policisë Korçë ka referuar materialet në Prokurori, duke nisur procedime penale ndaj disa shtetasve për vepra të ndryshme penale, të evidentuara nga shërbimet e komisariateve në territorin e qarkut.
Nga Komisariati i Policisë Korçë u proceduan penalisht shtetasit S. M., 54 vjeç, G. M., 19 vjeç, të dy banues në fshatin Porodinë, si dhe K. O., 30 vjeç, banues në Korçë. Ata janë konfliktuar fizikisht në lagjen nr. 17 të qytetit të Korçës, për motive të dobëta. Si pasojë e konfliktit, janë dëmtuar shtetasit S. M. dhe K. O., të cilët, pasi morën ndihmë mjekësore në spital, u larguan në banesë. Po ashtu, u procedua penalisht shtetasja Xh. N., 45 vjeçe, banuese në Korçë, e dyshuar për vjedhjen e portofolit të një shtetaseje. Portofoli u sekuestrua nga Policia në cilësinë e provës materiale.
Ndërkohë, shërbimet e Komisariatit të Policisë Pogradec nisën procedim penal ndaj shtetasve Xh. M., 41 vjeç, B. M., 37 vjeç dhe Dh. S., 40 vjeç, banues në Tiranë, për veprat penale “Dhunimi i varreve” dhe “Shkatërrimi i pronës”, kryer në bashkëpunim. Ata u konstatuan në fshatin Selcë e Poshtme, pranë zonës së njohur si “Varret Ilire”, duke kryer gërmime me mjete pune dhe me një pajisje të dyshuar si detektor për kërkimin e thesareve. Pajisjet dhe sendet e përdorura u sekuestruan si prova materiale.
Nga Komisariati i Policisë Devoll u referuan materialet në Prokurori për shtetasin E. S., 34 vjeç, banues në fshatin Stropan, pasi gjatë kontrollit të celularit të tij, në ambientet e një lokali, u konstatuan faqe për baste sportive.
Të gjitha materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme ligjore.
