Policia e Korçës ka referuar në Prokurori dy raste të veçanta për ndjekje penale, pas evidentimit të shkeljeve nga strukturat hetimore.
Në Devoll, specialistët për Hetimin e Krimeve të Komisariatit të Policisë referuan materialet në Prokurori për shtetasin N. Z., 34 vjeç, banues në fshatin Arrëz. Ai u kap duke transportuar një sasi lëndë drusore të prerë në mënyrë të paligjshme. Lënda drusore është sekuestruar në cilësinë e provës materiale dhe ndaj tij ka nisur procedimi penal.
Në Korçë, është referuar për vlerësim kallëzimi i bërë nga shtetasi I. B., 58 vjeç, banues në fshatin Shamoll, i cili ka deklaruar se ka konstatuar mungesën e një shume lekësh në banesën e tij.
Nga veprimet e para hetimore nuk janë vërejtur dëmtime fizike apo shenja të hyrjes me dhunë në banesë. Policia po vijon punën për sqarimin dhe verifikimin e plotë të rrethanave të rastit.
Materialet procedurale për të dyja rastet janë dërguar pranë Prokurorisë së Gjykatës së Shkallës së Parë të Juridiksionit të Përgjithshëm Korçë për veprime të mëtejshme ligjore.
