Seksioni i Hetimit i Drejtorisë Vendore për Kufirin dhe Migracionin Korçë ka finalizuar me sukses operacionin policor të koduar “Depozita”, duke goditur një rast kontrabande me naftë në afërsi të Pikës Kufitare Qafë Thanë.
Në kuadër të operacionit, shërbimet e kufirit ndaluan një automjet të drejtuar nga shtetasi I. M., 64 vjeç, banues në Pogradec. Gjatë kontrollit, në automjet u gjet një depozitë rezervë me sasi nafte, për të cilën drejtuesi nuk posedonte asnjë dokument apo faturë që të justifikonte origjinën apo destinacionin e mallit.
Pas përfundimit të veprimeve procedurale, I. M. u arrestua në flagrancë dhe akuzohet për veprën penale “Kontrabanda me mallra për të cilat paguhet akcizë ose me pezullim të plotë apo të pjesshëm nga detyrimet doganore ose të akcizës”.
Gjithashtu, në lidhje me këtë rast, nisi procedimi penal edhe për shtetasin V. B., 56 vjeç, me detyrë doganier në PKK Qafë Thanë. Ky i fundit dyshohet për veprën penale “Shpërdorimi i detyrës”, pasi dyshohet se ka neglizhuar kryerjen e kontrollit në automjetin e sekuestruar.
Si provë materiale u sekuestrua depozita me naftë, ndërsa materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
Policia e Kufirit dhe Migracionit Korçë vijon kontrollet intensive gjatë sezonit veror, me qëllim goditjen e krimeve ndërkufitare dhe kontrabandës së mallrave që i nënshtrohen akcizës.
