Radhë të gjata janë regjistruar në pikën kufitare të Qafë Thanës, kryesisht në segmentin neutral përpara hyrjes në Maqedoninë e Veriut. Kjo situatë vjen pas përfundimit të fundjavës, kur shumë qytetarë që kanë kaluar pushimet në bregdetin shqiptar po kthehen në vendet e tyre të banimit.
Radha shtrihet në katër korsi dhe udhëtarët që synojnë të kalojnë kufirin nga Shqipëria drejt Maqedonisë detyrohen të presin më shumë se një orë për të përfunduar procedurat.
Pavarësisht marrëveshjes mes dy qeverive për një ndalesë të përbashkët kufitare, kjo masë, që është zbatuar prej dy vitesh, nuk ka sjellë rezultate konkrete në përshpejtimin e kalimeve. Kontrollet vijojnë të kryhen nga të dy palët në të njëjtën pikë, duke krijuar ngarkesa dhe vonesa.
Burimet pranë kësaj pike kufitare bëjnë me dije se janë duke u shqyrtuar opsione për një riorganizim të skemës së kontrollit, me synimin që verifikimet të kryhen vetëm nga pala pritëse në momentin e hyrjes, për të shmangur procedurat e dyfishta dhe për të përmirësuar qarkullimin në kufi.
