Rakia me “Nam” e Boboshticës, aty ku gratë e prodhojnë por edhe e pijn
Në shtëpinë e boboshtarëve të Korcës, rakia e prodhuar prej tyre në mënyrë artizanale nuk mungon asnjëherë.
Tradita shekullore për prodhimin e rakisë së manit vijon ende nga banorët e fshatit të Boboshticës në Korçë. Në çdo shtëpi nuk mungon qerasja me raki mani, teksa zonjat e shtëpive, të cilat janë bërë dhe mjeshtre të zierjes, shprehen se kjo raki ka edhe efekte kurative.
Banorët të tregojnë se manat nga të cilat prodhohet rakie, janë sjellë në Boboshticë që në kohën e Skënderbeut, e ndërsa sot ky prodhim shkon deri në Amerikë.
“Rakia e manit tek ne është shekullore, nuk dihet saktë se prej sa vitesh janë këtu, thonë që janë që nga koha e Skënderbeut. Nxjerrim për vete edhe shesim cfarë tepron. Nami i kësaj rakie ka shkuar deri në Amerikë” thotë një banor i fshatit.
Por nëse dikur zierja e rakisë bëhej vetëm nga burrat, tashmë stafetën e kanë marrë gratë boboshtare. Përpos faktit që shëërben për qerasje, zonjat thonë se rakia ka efekte shumë të mira kurative.
“Ne manin e grumbullojmë, e mbajmë tre ditë në një but dhe më pas e ziejmë e bëjmë raki. Këtë punë bëjmë ne e kemi edhe për të shitur edhe për turistët edhe për ta pirë vetë. Është shumë e mirë për sëmundje, po u sëmure dhe ke probleme me ftohjen me raki mani lyhesh dhe shërohesh” thotë një zonjë boboshtare e cila merret me zierje rakie.
Banorët e kanë lidhur ngushtë jetën me manin kjo pasi është një frut i cili nuk do shumë shërbim por nga ana tjetër jep mjaftueshëm fitim, Në Boboshticë vështirë se gjen familje që nuk prodhon raki ashtu si vështirë të gjesh raki nëse nuk e ke porositur më parë, pasi në sezonin kur prodhohet është e gjitha e shitur.
