Bashkia Pogradec ka reaguar lidhur me debatet e fundit që kanë shoqëruar projektvendimin për “Dhënien me qira të sipërfaqeve tokë shtetërore në Çerravë”, duke sqaruar se projekti është rishikuar pas konsultimeve me banorët dhe nuk prek zonat me status kullotë.
Sipas njoftimit zyrtar, projektvendimi fillestar parashikonte një sipërfaqe prej 65 hektarë e 8459 m², por pas pesë takimeve konsultative me banorët e zonës, sipërfaqja u reduktua në 34 hektarë e 6660 m², që ka statusin “pemtore”. Banorët kishin kërkuar që nga harta të hiqeshin zonat që përdoren për blegtori, kërkesë që u pranua nga Bashkia.
Ky version i rishikuar u diskutua sërish me përfaqësues të fshatit dhe, pas dakordësisë parimore, u paraqit për miratim në Këshillin Bashkiak. Projektvendimi u miratua me 19 vota pro, pas sqarimeve të specialistëve që garantuan se nuk preken sipërfaqet e kullotave.
Në mbledhjen e Këshillit ishin të pranishëm edhe përfaqësues të banorëve të Çerravës, ku gjatë debatit pati momente tensioni dhe përdorim të fjalorit fyes ndaj anëtarëve të Këshillit. Pas votimit, një prej përfaqësuesve të fshatit u përfshi në përplasje verbale dhe fizike, situatë që tashmë është referuar pranë organeve ligjzbatuese për sqarimin e rrethanave dhe përgjegjësive.
Në përmbyllje të reagimit, Bashkia Pogradec thekson se ka të gjithë të drejtën ligjore për mbrojtjen dhe administrimin e tokës shtetërore në territorin e saj dhe për dhënien me qira të saj për individë apo subjekte me qëllim zhvillimin ekonomik.
Institucioni bën me dije gjithashtu se mbetet i hapur për dialog dhe konsultim me komunitetin, duke dëgjuar dhe reflektuar mbi shqetësimet e qytetarëve, ashtu siç është vepruar edhe në rastin e banorëve të Çerravës.
