Para pak ditësh isha në Turqi. Kur hymë në hotel, recepsionistja sheh që jemi shqiptarë. Ja tregon pasaportën tonë një punojësi tjetër dhe sikur u morën vesh me sy për diçka. Filluan të punonin më shpejt sesa për të tjerët, vihej re lehtë.
Teksa shkoja për në dhomë, një burrë me autoritet, aq sa kamarierët por dhe turistët nuk i afroheshin asaj tavoline, ngrihet në këmbë dhe thërret “Mirëdita vëllezër”
Mirëdita, qenke shqiptar?
-Po jam nga Kosova, nga Prizreni. Jam pronari i këtij hoteli. Unë jam Refki Agallar.
Lere këtë mbiemër ore, se ti e ke Agallari. Nuk ka Agallar në Kosovë. Ka Agallari. Apo ta kanë “mbledhur” turqit?
Buzëqesh lehtë burri që kishte ca të çara nëpër duar, sikur kishte gjithë jetën nëpër operacione dhe teksa ma jep dorën, e shtrëngon fort dhe thotë – “Jam këtu për gjithçka që do të keni nevojë”
Këtë fragment e lashë këtu, nuk u mora shumë me kosovarin që i hoqi një “I” mbiemrit të vet, deri në momentin kur taksistët na pyesnin; “Në cili hotel t’u çojmë”
Teksa i thonim emrin e hotelit, pyesnin për herë të dytë, sikur nuk donin të na çonin aty. Kjo ndodhi me dy tre taksixhinj. Njërin, që fliste mirë anglisht, e zhbirova
Ore, pse pyete dy herë për emrin e hotelit? Kështu pyesin gjithmonë në Turqi apo çfarë?
-Arvnaut, aty është Refkiu. Refki kosovari. Zakonisht, hotelet e mira këtu i kanë rusët, duhet të jesh shumë i zoti të mbash një hotel në këtë zonë. Ka shumë kriminalitet. Refkiu është i vetmi kosovar në Kaleiçi që ka duruar.
Po ju, pse trembeni?
-Punojësit aty kanë një parullë o arnaut; “Lum kush nuk e provon inatin e një kosovari”
Më bëri përshtypje gjithçka. Ose jo. Se thjesht një i fortë do jetë. Por kur shihja gjithë punojësit aty me sa zell e dëshirë punonin, pyeta një vajzë të re, afro 20 vjeç. Më tregoi se Refkiu shkonte në çdo sebep familjar të tyre, i mbronte familjet e tyre dhe çdo problem ua zgjidhte.
Kur ika, kërkova Refkiun ta takoja.
-O Refki Agallari, lum kush nuk provon inatin e kosovarëve dhe lum kush provon besëlidhjen e tyre.
Buzëqeshëm, ma shtrëngon dorën aq sa po më dhimbte dhe thotë – Mbiemri im është kosovar, shqiptar, jo Turqia por gjithë bota nuk e ndryshon dot…
Nga Xhensil Shkëmbi
