Në fund të fazës së parë të regjistrimeve, Universiteti i Korçës, “Fan Noli”, ka përmbushur vetëm një të katërtën e kuotave që ka në dispozicion.
Edhe pse në përqindje mund të duket nivel i ulët, rektori i Universitetit shprehet optimist për fazat e më vonshme, por edhe në krahasim me vitin e kaluar.
“Në krahasim me 1 vit më parë kemi më shumë regjistrime në programet bachelor, ndërkohë që presim më shumë deri në përfundim të raundeve, ka një rritje edhe tek programet që qeveria mbështet sidomos tek bujqësia” tha Bello.
Sa i takon programeve që nuk kanë fare apo numër të vogël regjistrimesh, rektori shpjegon se do të jetë Senati në fund të fazave të regjistrimit që do të vendosë.
“Kemi pak regjistrimecnë programet 2 vjeçare, ka programe që nuk kanë fare të regjistruar. Ndërkohë që problematike me regjistrimet janë edhe matematikë-fizika, ekomomiksi dhe filozofi-sociologjia. Dua të theksoj se në fund të regjistrimeve do të jetë senati që do të vendosë se cilat programe do të vijojnë dhe cilat do të pezullohen.
Më të preferuarat edhe për këtë vit mbeten edukimi fizik, financë-kontabilitet dhe infermeria që plotësohen 100%.
Universiteti i Korçës “Fan Noli” ka 1050 kuota për 24 programe të arsimit të lartë dhe në përfundim të fazës së parë janë regjistruar 182 studentë.
Disa muaj më parë, rektori i këtij universiteti dhe senati hodhën idenë e bashkimit me Universitetin e Tiranës për shkak të numrit të ulët të studentëve, por që ministria e Arsimit vendosi që të vijojë si i pavarur.
