Reshje bore janë regjistruar në orët e fundit në zonat malore të qarkut Korçë mbi 1200 m lartësi, veçanërisht në segmentin Boboshticë–Dardhë. Ekipet kontraktore janë në terren dhe po punojnë për pastrimin e rrugëve dhe kriposjen, duke garantuar qarkullim të sigurt. Aktualisht nuk raportohen problematika.
Në Bashkinë Kolonjë situata vijon drejt stabilizimit. Është ndërhyrë në Tac Poshte për largimin e ujërave nga parcelat bujqësore, ndërsa në fshatin Qinam është kryer devijimi i lumit për mbrojtjen e këmbëve të urës, në bashkëpunim me Drejtorinë Rajonale të Rrugëve Rurale. Në zonat mbi 1500 m reshjet kanë qenë në formë bore.
Në Maliq, niveli i lumit Devoll është ulur me rreth 1.30 cm, çka ka sjellë përmirësim të situatës së prurjeve. Vijon shpërndarja e ndihmave për 100–150 familje të prekur nga përmbytjet, të siguruara nga Rezervat Materiale të Shtetit.
Në Pustec reshjet kanë qenë të dobëta dhe uji i akumuluar në bodrume është larguar plotësisht. Nuk raportohen problematika të reja as në Bashkitë Devoll dhe Pogradec. Në këtë të fundit, dje u riparuan rrëshqitjet e dheut në Gurras dhe Dardhas, u pastruan kanalizime në Bucimas dhe sot nis shpërndarja e ndihmave për familjet e dëmtuara.
Situata e energjisë elektrike (OSHEE)
Pa energji vijojnë të jenë disa zona rurale në bashkitë Devoll, Korçë dhe Kolonjë (nga 6 deri në 11 abonentë për zonë), ndërsa të gjithë fiderat që furnizojnë objektet e rëndësisë së veçantë funksionojnë normalisht.
Gjendja e akseve rrugore (ARRSH Qendër-Lindje)
- Boboshticë–Dardhë: reshje bore, kryhet pastrim dhe kriposje.
- Korçë–Ersekë, Zemblak–Goricë, Bilisht–Miras: reshje shiu të lehta deri mesatare, qarkullim normal.
- Ersekë–Leskovik–3 Urat: reshje të lehta, qarkullim normal.
- Maliq–Lozhan–Kufi Gramsh: reshje gjatë natës, janë evidentuar rënie gurësh dhe inertesh – në punë për pastrimin.
Strukturat vendore dhe ekipet e emergjencave janë në terren dhe vijojnë monitorimin e situatës në të gjitha zonat potencialisht problematike.
