Fillimi i muajit gusht ka sjellë rritje të ndjeshme të lëvizjes në pikat kufitare, veçanërisht në Kapshticë dhe Qafë Thanë, ku është vënë re një fluks i lartë hyrjesh dhe daljesh të udhëtarëve. Shumë emigrantë shqiptarë kanë zgjedhur të kalojnë pushimet pranë familjarëve të tyre ose në bregdetin shqiptar, por ka patur edhe nga ata që pas disa ditëve qëndrimi në Shqipëri, kanë nisur tashmë rikthimin drejt vendeve ku jetojnë dhe punojnë.
Sipas të dhënave zyrtare, në PKK Kapshticë janë regjistruar gjithsej 9.456 kalime shtetasish dhe 3.439 mjete, ndërsa në Qafë Thanë janë regjistruar 10.070 kalime shtetasish dhe 3.580 mjete. Pika të tjera kufitare si Tushemishti dhe Gorica gjithashtu kanë raportuar fluks të lartë, me mbi 3.300 dhe gati 1.000 kalime shtetasish përkatësisht.
Autoritetet kufitare kanë shtuar sportelet, kanë rritur praninë e stafit policor dhe kanë aplikuar procedura të përshpejtuara, duke garantuar një proces të qetë dhe të menaxhuar mirë, pa vonesa të theksuara. Fluksi pritet të vijojë me ritme të larta deri në fund të muajit gusht.
