Muzeu Kombëtar i Artit Mesjetar në Korçë ka shënuar një rritje prej 60% të vizitorëve gjatë muajit prill, krahasuar me të njëjtin muaj të një viti më parë. Sipas drejtoreshës së MKAM, Fjoralba Prifti, gjatë këtij muaji muzeu është vizituar nga 2544 persona, prej të cilëve 839 ishin turistë të huaj, kryesisht nga Gjermania dhe Spanja.
Në total, gjatë katër muajve të parë të vitit 2025, dy institucionet kulturore të Korçës – Muzeu Kombëtar i Artit Mesjetar dhe Muzeu Kombëtar i Arsimit – janë vizituar nga 7733 persona, si vendas ashtu edhe të huaj.
Muzeu Kombëtar i Artit Mesjetar, i hapur më 24 prill 1980, festoi muajin e kaluar 45-vjetorin e krijimit. Ai ruan dhe ekspozon trashëgiminë më të çmuar të artit ikonografik shqiptar, me vepra që datojnë që nga shekujt XII dhe XIV. Në fondin e tij përfshihen rreth 7500 objekte artistike prej guri, druri, leshi, argjendi dhe metalesh të tjera, mes të cilave mbi 1200 objekte dhe rreth 6000 ikona, shumica e të cilave i përkasin periudhave nga epoka e bronzit dhe ajo e hekurit. Muzeu ruan gjithashtu edhe kostume folklorike e objekte të tjera që pasqyrojnë traditën dhe kulturën qytetare shqiptare ndër shekuj.
Ky interes në rritje dëshmon vëmendjen gjithnjë e më të madhe që turistët dhe vizitorët i kushtojnë trashëgimisë kulturore shqiptare.
