Ka marrë flakë gjatë natës lokali i këngëtarit të njohur Noizy në zonën e Currilave të Durrësit. Kjo është djegia e dytë, që dyshohet sërish të jetë e qëllimshme, brenda këtij muaji në lokalin në emër të babait të tij B. Rajku.
Vet Rigelsi ka deklaruar se zjarri është vënë nga një familjari i tij. Ai ka trembur fillimisht rojet dhe më pas ka vazhduar me zjarrvënien. Autori është kapur në flagrancë nga forcat policore.
Në vendngjarje kanë arritur forca të shumta policie, zjarrfikëse si dhe një autoambulancë.
Zjarri në herën e parë të këtij muaji u njoftua nga vetë biznesi se ka qenë si pasojë e një shkëndije elektrike, duke shkaktuar vetëm dëme materiale.
Ndryshe, prej vitesh Noizy përveç muzikës ka investuar kohën e tij edhe në fushën e biznesit dhe lokali nuk është veprimtaria e tij e vetme në biznes.
Njoftimi i Policisë;
Durrës/Finalizohet operacioni policor i koduar “Përsëritësi”, për zbardhjen e tre rasteve të zjarrvënieve ndaj biznesit dhe banesës së të njëjtës familje.
I vuri 2 herë (mëngjesin e sotëm dhe më datë 11.06.2023) zjarrin një lokali në lagjen “Currilat”, si dhe derës së banesës së nënës së pronarit të këtij lokali, identifikohet dhe arrestohet në flagrancë 26-vjeçari.
I ndaluari, lidhje familjare e shtetasve të dëmtuar.Në momentin e arrestimit, 26-vjeçarit iu sekuestrua një mjet prerës (thikë).
Si rezultat i punës intensive hetimore për disa raste zjarrvëniesh, të kryera gjatë periudhës 10.06.2023-29.06.2023, si dhe në kuadër të monitorimit të vazhdueshëm të situatës në nivel qarku, me qëllim parandalimin dhe goditjen e paligjshmërive.
Specialistët e Seksionit për Hetimin e Krimeve të Komisariatit të Policisë Durrës kanë organizuar dhe finalizuar operacionin policor të koduar “Përsëritësi”, në kuadër të të cilit u identifikua, u kap dhe u arrestua në flagrancë shtetasi E. M., 26 vjeç.
Nga veprimet e shpejta dhe profesionale policore, 26-vjeçari (lidhje familjare e shtetasve të dëmtuar) u kap në flagrancë mëngjesin e sotëm, pasi i kishte vënë zjarrin një lokali në lagjen “Currilat”, në pronësi të shtetasit B. R.Gjithashtu, nga hetimet dyshohet se i njëjti shtetas i ka vënë zjarrin të njëjtit lokal, më datë 11.06.2023, si dhe derës së banesës së nënës së pronarit të këtij lokali, më datë 10.06.2023.
Në momentin e arrestimit, 26-vjeçarit iu gjet dhe iu sekuestrua një mjet prerës (thikë).Vijon puna hetimore për dokumentimin e plotë ligjor të rrethanave të këtyre rasteve.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
