Më 15 maj 2024 u largua nga bota e gjallë legjenda e Valles Devolliçe, z.Shefki Kordalli në moshën 97 vjeçare.
Z. Shefki lindi dhe u rrit në një epokë ku punohej e stimuloheshin shumë të gjitha artet, në veçanti arti tradicional ku me një grup Devollinjsh arritën të kapin maja të Artit, majat e interpretimit virtuoz që do t’u jepte shansin jo vetëm të ishin prezent e të korrnin sukses në skenat shqiptare por dhe në gjithë vendet e lindjes.
Dua të veçoj pjesëmarrjen dhe nderimin me Çmimin e Dytë në Festivalin Botëror të Moskës në vitin 1952 përballë 81 shteteve. Ai bashkë me gjashtë shokët e tij fenomenalë si Ali Kondi me të vëllanë që ishin dhe këngëtarë dhe valltaret fluturues, lanë kudo gjurmë të pa shlyera.
Ai ndihej shumë i lumtur që ariti të bëjë djalin e tij jo vetëm valltar të talentuar por dhe kereografin e Devollit dhe që arriti ti mbrojë me sakrifica të panumërta këto kryevlera gjatë një tranzicioni të stërzgjatur dhe emigrimi të pakontrolluar.
Fluturonte nga gëzimi për grupin e djemve të Devollit, dhe u lumturua shumë kur Ministria e Kulturës e shpalli Vallen e Devollit si një Kryevlerë e Artit Kombëtar Shqiptar.
Ndarja nga kjo botë, është një humbje e madhe për të gjithë Devollin, veçanërisht për familjen që duhet të gjejnë forcë për ta përballuar. Shefkiut i ndritë shpirti në parajsë e qoftë i paharruar.
