Pas reshjeve të shiut në 24 orët e fundit, situata në territorin e Bashkisë Pogradec paraqitet e qetë dhe e normalizuar, njofton Bashkia.
Në Njësinë Administrative Buçimas, janë evidentuar disa problematika në fshatrat Gështenjas dhe në burimet e Gurasit, ku ekipet e terrenit po punojnë për pastrimin dhe zhbllokimin e rrugëve.
Në njësitë Dardhas dhe Velçan, ka pasur dalje inertesh dhe rrëshqitje dherash, ndërhyrjet e ekipeve të bashkisë dhe strukturave përkatëse po vijojnë gjatë ditës për normalizimin e plotë të situatës.
Situata energjetike është e stabilizuar. Në disa fshatra të njësisë Dardhas pati shkëputje të përkohshme të energjisë elektrike, por falë ndërhyrjes së OSHEE, furnizimi është rikthyer.
Fatmirësisht, nuk janë raportuar emergjenca shëndetësore. Të gjitha ekipet e bashkisë dhe strukturat përkatëse vazhdojnë punën në terren për të përballuar çdo situatë problematike që mund të shfaqet.
Bashkia apelon tek banorët të shmangin lëvizjet e panevojshme dhe të raportojnë çdo problem te kryetarët e njësive administrative ose në numrat e emergjencës.
