Ekipi i volejbollit për femra i Skënderbeut ka nisur me ambicie të larta përgatitjet për sezonin e ri, duke ndërhyrë fuqishëm në merkato. Klubi korçar synon ndërtimin e një skuadre pretendente për trofe dhe rikthimin në elitën e volejbollit shqiptar.
Burime pranë ekipit konfirmojnë se do t’i bashkohen 7 lojtare të reja, nga të cilat 4 janë të huaja. Ndërkohë, nga përforcimet vendase, njëra prej tyre pritet të marrë drejtimin e lojës si organizatore, një rol vendimtar për ritmin dhe strukturën e skuadrës në fushë.
Trajnerët Haxhillari dhe Shishi kanë ndërtuar një strategji të qartë: të shfrytëzojnë fuqinë goditëse të volejbollisteve të huaja dhe të forcojnë repartin ofensiv. Me këto përforcime, Skënderbeu synon të bëhet një rival i fortë në garën për titullin kampion dhe të jetë protagonist në të gjitha kompeticionet e sezonit.
