Korçari që dashuron shpendët, Stefan Sose tregon pasionin e veçantë për të ushqyer zogjtë.
Në Korçë ka mjaft persona të apasionuar pas shpendëve, sidomos pëllumbave, të cilët falë kujdesit shihen trumba-trumba në disa zona të qytetit.
Në një hapësirë publike të Korçës, të njohur si “trekëndëshi” është një nga të apasionuar pas shpendëve. Stefan Sose, identifikohet ky korçar që ka angazhim të përditshëm trajtimin me ushqim të shpendëve.
Një guguçe dhe një dyzinë trumcakësh janë vizitorët e përditshëm që i mblidhen paqësisht rreth e rrotull, teksa Stefani me një buzëqeshje në fytyrë e ngazëllim në shpirt u shpërndan copa buke e fara si ushqim. Mbi kokë i qëndron urtë e butë një guguçe, shpendi që e ka më për zemër.
“E kam rritur që të vogël, kishte rënë nga foleja dhe ishte plagosur. Ka tre muaj që kujdesem, siç i thonë me ushqim goje, dhe ja ku ma shpërblen besnikërisht e më qëndron si fëmijë mbi kokë” thotë Stefan Sose.
Gjithaq si shpendi i guguçes që e ka më të preferuarin, i cili edhe pse në gjendje të lirë nuk i ndahet shpëtimtarit të tij, edhe trumcakët i ka mësuar me ushqim të përditshëm që ti rinë pranë. “Nuk kam ndonjë orar kur i ushqej. Vij këtu kohë pas kohe dhe këta shpendë sikur më njohin e më mblidhen rrotull. Nganjëherë grindem edhe me familjen, se duhet siguruar ushqim, por unë jam shumë i dhënë pas këtij pasioni dhe nuk mund ti braktis këta shpendë” thotë korçari që dashuron zogjtë.
