Në moshën 21-vjeçare, Stivi Kereku po shfaqet si një prej talenteve më premtues të atletikës shqiptare. I lindur dhe rritur në Korçë, ai ka treguar një përkushtim të jashtëzakonshëm në pistë, duke fituar tre vite rresht titullin e kampionit kombëtar U20 në garën e 400 metrave. Përveç kësaj, Kereku ka arritur të fitojë titullin e kampionit të Kupës së Shqipërisë si në 400 metra ashtu edhe në 200 metra, duke treguar se është një atlet i aftë në distanca të ndryshme dhe gjithmonë i gatshëm për të konkurruar në nivelin më të lartë.
Performancat e tij të shkëlqyera nuk kanë kaluar pa u vënë re në arenën ndërkombëtare. Stivi është pjesë e ekipit kombëtar dhe ka vendosur një rekord të rëndësishëm për stafetën 4x400m mix gjatë Kampionatit Europian të Ekipeve në Poloni. Ai ka marrë pjesë gjithashtu në disa kampionate ballkanike, si për grupmoshat U20 ashtu edhe për kategorinë e seniorëve, duke përfaqësuar Shqipërinë me krenari dhe duke përmirësuar vazhdimisht rezultatet e tij.
Stivi Kereku është aktualisht ndër atletët më të shpejtë të vendit me kohën e tij më të mirë prej 48.69 sekonda në 400 metra, një rekord që vetëm Kastriot Sulçe e ka përmirësuar, por me kronometër dore, jo elektronik. Synimi i tij kryesor mbetet të fitojë titullin e kampionit kombëtar dhe të thyejë rekordin kombëtar në garën e 400 metrave, duke çuar më tej traditën e shkëlqyer të atletikës shqiptare dhe duke vendosur emrin e tij mes të mëdhenjve të këtij sporti.
