Të mërkurën në orën 15:00 stadiumi i Hamburgut pret duelin e Grupit B të Euro 2024 mes Kroacisë dhe Shqipërisë. Ndeshja e parë mes tyre në histori është jetike për të dyja skuadrat pasi Shqipëria e pësoi 2-1 nga Italia, ndërsa Kroacia u mund 3-0 nga Spanja.
Trajneri i Kroacisë Zlatko Dalic tha se kjo ndeshje është deçizive për skuadrën dhe duhet ta mundin Shqipërinë.
“Do të bëjmë një analizë të Shqipërisë për të gjetur një zgjidhje kur të përballemi me ta. Sigurisht që do të përpiqemi të shohim diçka ndryshe në këtë Shqipëri. E dimë që ndeshja e ardhshme në thelb është deçizive dhe ne duhet t’i mposhtim ata.
Në këtë mënyrë, ne do të shohim se çfarë do të bëjmë në veçanti, nuk ka dyshim për këtë, por ne patjetër duhet të ndryshojmë diçka. Gjithçka është ende në duart tona, ende nën kontrollin tonë. Ne duhet të jemi më mirë në fushë. Më takon mua t’i kthej gjërat, të tregoj të metat dhe të mos ndalem shumë në ndeshjen e humbur me Spanjën“, tha Dalic.
