Drejtoria Vendore e Policisë Korçë ka finalizuar me sukses operacionin policor të koduar “Next”, i cili kishte si objektiv goditjen e veprimtarisë kriminale të shpërndarjes së lëndëve narkotike në doza, në qytetin e Korçës.
Në kuadër të këtij operacioni u arrestuan në flagrancë tre shtetas, që dyshohet se bashkëpunonin për shitjen e dozave të kokainës dhe kanabisit në zona të ndryshme të qytetit. Njëri prej tyre ishte i dënuar më parë për të njëjtën veprimtari kriminale.
Të arrestuarit janë: Z. Ç., 55 vjeç dhe J. Ç., 43 vjeçe (bashkëshortë), banues në Korçë dhe O. Sh., 36 vjeç, banues në Korçë, me precedent penal për veprën penale “Prodhimi dhe shitja e narkotikëve”.
Gjatë kontrollit të ushtruar në lagjen nr. 4 të qytetit, në automjetin me drejtues shtetasin O. Sh. dhe pasagjer Z. Ç., si dhe gjatë kontrollit fizik ndaj tyre, shërbimet e Policisë gjetën sasi të lëndës narkotike kokainë dhe një shumë parash të dyshuar si e përfituar nga shitja e drogës.
Kontrollet vijuan edhe në banesat e tyre, ku u sekuestruan dhjetëra doza të kokainës të gatshme për shitje, 2 peshore elektronike, si dhe sende të tjera të lidhura me veprimtarinë kriminale. Gjithashtu, gjatë kontrollit në subjektin e shtetases J. Ç. (parukeri), u gjet dhe sekuestrua një sasi kanabisi, e ndarë në doza të gatshme për tregtim.
Në total, gjatë operacionit u sekuestruan dhjetëra doza kokainë dhe kanabis, 2 automjete, 3 aparate celularë dhe një shumë parash e dyshuar si e përfituar nga shitja e drogës.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme ligjore.
Policia e Korçës mbetet e angazhuar dhe e vendosur për të luftuar paligjshmërinë dhe veprimtarinë kriminale në çdo formë, në shërbim të sigurisë së qytetarëve.
