Për shkak të reshjeve të dendura që kanë përfshirë të gjithë rajonin e juglindjes, tregu industrial i Pogradecit është përfshirë nga uji, duke dëmtuar produktet dhe materialet që ndodhen brenda. Që në orët e para të mëngjesit, tregtarët janë munduar të largojnë ujin me kova dhe leckë, por reshjet e shumta kanë bërë që situata të jetë jashtë kontrollit, duke lënë tregun të lagur dhe materialet e dëmtuara.
Sipas tregtarëve, ata punojnë në këtë treg prej shumë vitesh dhe, megjithëse Bashkia ka premtuar ndërtimin e një tregu të ri, deri tani nuk është marrë asnjë iniciativë konkrete. Sot, ata drejtojnë një apel tek autoritetet lokale për të ndërmarrë masa të menjëhershme për përmirësimin e situatës aktuale dhe për krijimin e kushteve për një treg modern dhe të sigurt për të ardhmen.
