Presidenti i Shteteve të Bashkuara, Donald Trump, pritet të nënshkruajë të hënën një urdhër ekzekutiv që synon të ndryshojë mënyrën e administrimit të vaksinave te fëmijët, duke kërkuar më shumë fleksibilitet dhe kërkime të reja shkencore në këtë fushë.
Njoftimi zyrtar u bë i ditur nga sekretarja e shtypit e Shtëpisë së Bardhë, Karoline Leavitt, përmes një komunikimi në platformën X. Sipas raportimeve nga media amerikane Axios, ky urdhër do të kërkojë një qasje të re për imunizimin e fëmijëve, duke përfshirë ndarjen e vaksinës së kombinuar kundër fruthit, shytave dhe rubeolës në tre doza të veçanta, të cilat do të jepen në vizita të ndara mjekësore.
Ndarja e dozave të vaksinës MMR
Duke cituar tekstin e urdhrit ekzekutiv, media raportoi detajet e këtij vendimi që pritet të hyjë në fuqi. “Vaksina e kombinuar MMR duhet të administrohet në tre doza të ndara për një sëmundje të vetme, sapo produkte të tilla të jenë të disponueshme në vend dhe, në masën maksimale të mundshme, të gjitha imunizimet e fëmijërisë duhet të administrohen në vizita të ndara mjekësore”, theksohet në dokumentin e cituar nga Axios.
Ky vendim i ri i administratës amerikane pritet të sjellë ndryshime në protokollet standarde të vaksinimit, duke kërkuar që prindërit dhe mjekët të planifikojnë vizita të shumëfishta për të përfunduar ciklin e imunizimit të fëmijëve për këto sëmundje specifike.
