Më shumë se 800 mijë turistë të huaj kanë vizituar Korçën dhe fshatrat e saj turistikë nga muaji mars e deri më tani, sipas burimeve pranë Zyrës së Turizmit në Bashkinë Korçë, duke konfirmuar një rritje të ndjeshme të fluksit dhe zgjatje të sezonit.
Operatorët turistikë lokalë bëjnë me dije se rreth 85 deri në 90 për qind e vizitorëve që kanë zgjedhur qytetin dhe fshatrat si Voskopoja, Dardha, Boboshtica dhe Vithkuqi janë shtetas të huaj. Përveç rritjes së numrit të përgjithshëm, këtë vit evidentohet një ndryshim i rëndësishëm në tendencat e turizmit: turistët po zgjasin qëndrimin e tyre dhe rezervimet po shtrihen në më shumë muaj të vitit, duke shmangur kufizimin vetëm gjatë periudhave të pikut.
Rezervime në kapacitet maksimal deri në vjeshtë
Menaxherja Eriketa Koçollari tregon se kërkesat e larta vijojnë edhe gjatë vjeshtës, ndërsa vërehet hyrja e tregjeve të reja turistike në rajon. “Rezervimet vazhdojnë në shtator dhe tetor. Është deri në 100% prenotime, në kapacitetin maksimal. Do vazhdojmë me rezervimet për vitin tjetër. Janë 90% të tyre turistë të huaj. Sa i përket Korçës, kemi pasur turistë nga Suedia dhe Norvegjia, që nuk ka qenë në këto ritme në vitet e kaluara. Sezoni prej muajit prill deri në tetor, 80% janë të huaj, dhe më pas deri në shkurt me shqiptarë”, u shpreh ajo.
Rritje e grupeve të organizuara nga Europa Western
Nga ana tjetër, edhe operatorë të tjerë konfirmojnë se prania e grupeve të organizuara ka pasur një ecuri mjaft pozitive. Menaxheri i hotelit Klaus Pronjari nëmron disa nga shtetet me fluksin më të madh të turistëve. “Turistët kanë qenë në numër më të lartë se vitet e kaluara. Pjesa më e madhe e tyre janë të huaj. Zgjedhin Korçën, grupet kanë qenë të shumta, nga pranvera në nëntor. Kohëzgjatja është më e madhe dhe grupet kanë pasur numër të madh turistësh. Belgjika, Franca dhe Spanja janë pjesa më e madhe e tyre”, u shpreh Pronjari. Të dhënat dhe dëshmitë e sektorit konfirmojnë se Korça po konsolidon pozicionin e saj si një prej destinacioneve më të preferuara për turizmin gjithëvjetor.
