Universiteti “Fan S. Noli” ka nënshkruar një marrëveshje bashkëpunimi me Universitetin e Tiranës dhe Universitetin “Ismail Qemali” në Vlorë, duke hapur rrugën për projekte të rëndësishme akademike dhe shkencore.
Në kuadër të kësaj marrëveshjeje, ndër pikat kryesore të bashkëpunimit janë programet e përbashkëta të studimit, të cilat përfshijnë diploma të përbashkëta ose të dyfishta, si dhe udhëheqje të përbashkët të studimeve doktorale.
Marrëveshja parashikon gjithashtu shkëmbime të personelit akademik dhe administrativ, mundësi për studentët që të ndjekin semestra studimi ose të kryejnë praktika pune në universitetet partnere, bashkëpunim në aktivitete të përbashkëta kërkimore dhe shkencore, aplikime në projekte dhe publikime të përbashkëta.
Pjesë e bashkëpunimit janë edhe pjesëmarrja në seminare, konferenca dhe evente akademike, shkëmbimi i literaturës shkencore, si dhe organizimi i shkollave verore apo dimërore dhe aktivitete në ndërtimin e kapaciteteve.
Ky hap pritet të forcojë lidhjet akademike mes institucioneve dhe të krijojë mundësi të reja zhvillimi për studentët dhe stafet e tre universiteteve.
