Në Shkollën Profesionale Shërbime në Korçë, numri i vajzave të regjistruara për këtë vit arsimor ka arritur në 35% të totalit, një rritje e ndjeshme që po përforcon gjithnjë e më shumë besimin në arsimin profesional si një alternativë e qëndrueshme për të ardhmen.
Drejtoresha e shkollës, Tatjana Mero, e konsideron këtë rritje një sinjal pozitiv që tregon se vajzat po i japin prioritet formimit profesional dhe aftësive praktike, të kërkuara në tregun e punës. Ajo thekson se aktivitete informuese dhe promovuese organizohen vazhdimisht për të motivuar vajzat ekzistuese dhe për të afruar të reja që janë në prag të zgjedhjes së shkollës së mesme.
“Po ndërtojmë një frymë të re, ku arsimi profesional nuk është më një zgjedhje e dytë, por një mundësi reale për të rinjtë dhe sidomos për vajzat, për të ndërtuar një karrierë të sigurt dhe të pavarur,” tha Mero.
Kjo tendencë është një hap i rëndësishëm drejt zhdukjes së paragjykimeve gjinore në sektorë të ndryshëm të formimit profesional dhe fuqizimit të rolit të vajzave në botën e punës.
