Vllaznia po tregohet mjaft aktive në merkaton e verës, me synimin për të përforcuar skuadrën në çdo repart për ndeshjet e Kupave të Europës. Së fundmi, burime pranë klubit bëjnë me dije se kuqeblutë kanë shfaqur interes për mesfushorin portugez Paulo Estrela, i cili aktualisht është pjesë e Skënderbeut.
Ideja e klubit shkodran ishte ta afronte lojtarin në formë huazimi vetëm për dy ndeshjet europiane ndaj Vikingurit. Megjithatë, transferimi i tij nuk mund të realizohet për shkak të kufizimeve të përcaktuara nga FIFA. Estrela ka luajtur më parë këtë vit me Portimonense, përpara se të bashkohej me Skënderbeun, dhe sipas rregullores, një futbollist nuk mund të luajë për më shumë se dy ekipe të ndryshme në të njëjtin vit kalendarik.
Kësisoj, Vllaznia është detyruar të heqë dorë nga tentativa për të marrë mesfushorin, pavarësisht se profili i tij përputhej me kërkesat e trajnerit Edi Martini.
Megjithatë, drejtuesit e klubit vazhdojnë të jenë aktivë në merkato, me synimin për të ndërtuar një skuadër konkurruese për ndeshjet në Europë dhe sezonin e ri në Superiore.
