Shqipëria mirëpriti evenimentin e radhës ndërkombëtar në sportin e volejbollit, teksa më datat 11-15 qershor në Tiranë u zhvillua Kampionatin Ballkanik U-19 për vajza.
Një kompeticion ku morën pjesë tetë shtete të rajonit, të cilat matën forcat për trofeun, ndërsa ndeshjet u luajtën në sallën e Farkës. Shqipëria shënoi 2 fitore dhe dy humbje, duke e mbyllur Ballkanikun në vendin e pestë.
Vajzat e drejtuara nga trajneri Erjols Haxhillari e filluan mbarë Grupin A, duke fituar ndeshjen e parë kundër Bosnjë-Hercegovinës me rezultatin 3-2 (25:19, 20:25, 30:28, 23:25, 15:11). Më pas në sfidën e dytë u mposhtën nga Serbia në shifrat 1-3 (11:25, 25:17, 9:25, 15:25). Në ndeshjen e tretë Shqipëria luajti shanset e saj për të luftuar për zonën e medaljeve, teksa u përball me Rumaninë. Ndonëse ishin shumë pranë suksesit, vajzat kuqezi u përmbysën, duke e humbur takimin me rezultatin 3-2 (25:16, 22:25, 21:25, 25:20, 15:13). Shqipëria u rikthye dje në parket për ndeshjen e fundit, atë për vendet 5-6, ku u përball me Maqedoninë e Veriut.
Vajzat kuqezi bënë një paraqitje të mirë, duke e fituar takimin me rezultatin 3-1 (25:16, 25:27, 25:11, 25:19), për tu klasifikuar të pestat. Një eksperiencë pozitive për Kombëtaren U-19, në të cilën u evidentuan disa elementë të rëndësishëm.
Kujtojmë që Shqipëria nuk përfaqësohet prej më shumë se gjashtë vitesh në arenën ndërkombëtare me ekipin e të rriturave për shkak të mungesës së financave.
