Nëna e 20-vjeçarit Joan Zuko, i cili mbeti i vrarë me armë zjarri në Korçë, ka njoftuar përmes rrjeteve sociale datën e ceremonisë së lamtumirës për të birin. Ornela Zuko bëri të ditur se përcjellja për në banesën e fundit do të bëhet më 11 gusht, në orën 12:00.
Përmes një mesazhi ku shpreh pamundësinë për t’u përgjigjur të gjithë ngushëllimeve në këto momente, ajo ka ndarë fjalët e fundit për djalin e saj. “Me zemrën e copëtuar dhe me dhimbjen më të madhe që mund të mbajë shpirti i një nëne, ne pamundësi për t ju përgjigjur te gjithëve ju njoftojmë se më 11 gusht, në orën 12:00, do t’i japim lamtumirën e fundit birit tim të vogël, dritës së syve të mamit. Biri im, ti do të mbetesh përjetësisht fryma ime, dashuria ime më e madhe dhe pjesa më e shtrenjtë e zemrës sime. Mami nuk do të të harrojë kurrë dhe do të të mbajë brenda shpirtit deri në frymën e fundit. U prehsh në paqe, engjëlli i mamit”, shkruan Ornela Zuko.
Hetimet mbi ngjarjen dhe i dyshuari
Joan Zuko humbi jetën pas një konflikti me armë zjarri. Për këtë ngjarje, Policia e Shtetit dhe forcat RENEA arrestuan pas një operacioni të dyshuarin Kristjan Sterjo, po ashtu 20 vjeç, disa orë pas krimit.
Sipas hetimeve paraprake të grupit hetimor, mes dy të rinjve kishte pasur konflikte edhe më herët. Autoritetet po vijojnë punën për zbardhjen e plotë të motivit dhe dinamikës së kësaj ngjarjeje, ndërsa i arrestuari pritet të përballet me drejtësinë për të dhënë llogari mbi akuzat.
