Një 32-vjeçare ruse është vënë në pranga nga autoritetet në lidhje me vrasjen e Robert Shageev, zëvendëskomandant i një brigade nëndetësesh të Flotës Ruse të Detit të Zi, i cili mbeti i vrarë nga një shpërthim në Sevastopol të Krimesë. Ngjarja ka ndodhur më 13 gusht, në orët e para të mëngjesit, kur një sasi eksplozivi e fshehur në një kosh mbeturinash shpërtheu teksa ushtaraku po kalonte pranë saj i veshur me uniformë.
Pretendimet e FSB-së dhe arrestimi i të dyshuarës
Sipas autoriteteve ruse, lënda plasëse kishte një fuqi prej rreth 500 gramësh TNT dhe komandanti humbi jetën në vendngjarje. Pak orë pas sulmit, Shërbimi Federal i Sigurisë së Rusisë (FSB) arrestoi shtetasen Margarita Reutt, banore e qytetit të Soçit. Autoritetet pretendojnë se gjatë kontrollit fizik asaj iu gjet një telekomandë që dyshohet se shërbeu për aktivizimin e bombës.
FSB pretendon se e dyshuara ka pranuar përfshirjen në sulm dhe ka dëshmuar se ishte rekrutuar nga persona të lidhur me inteligjencën ukrainase, me premtimin për një pagesë në kriptomonedha dhe pajisje me dokumente për t’u larguar nga Rusia. Këto pretendime nuk janë konfirmuar në mënyrë të pavarur, ndërsa Kievi zyrtar nuk ka bërë asnjë koment mbi ngjarjen apo mbi rolin e pretenduar të të arrestuarës.
Profili dhe ndryshimi i qëndrimeve të Margarita Reutt
Sipas një investigimi të publikuar nga e përditshmja britanike The Guardian, Margarita Reutt (e lindur me mbiemrin Yakovleva) bënte më parë një jetë krejtësisht të zakonshme. Ajo ishte rritur në Yaroslavl, kishte studiuar menaxhim në Novosibirsk dhe më pas ishte vendosur në Soçi, ku punonte në sektorin e turizmit dhe mjekësisë alternative, duke u marrë njëkohësisht me sporte si parashutizmi dhe vaterpolo.
Dëshmitë e të njohurve tregojnë se qëndrimi i saj ndaj autoriteteve dhe luftës kishte ndryshuar pas nisjes së pushtimit të Ukrainës. Në vitin 2025, ajo ishte gjobitur për “diskreditim” të ushtrisë ruse pas një reagimi publik. Muajt e fundit para arrestimit, ajo kishte blerë një telefon të dytë dhe udhëtonte shpesh në Krime, me pretendimin se kërkonte vende për xhirime videoklipesh. Çështja penale ndaj saj pritet të shqyrtohet nga gjykata me dyer të mbyllura.
