Universiteti “Fan S. Noli” në Korçë priti një delegacion nga Universiteti Wageningen në Hollandë, një ndër institucionet më prestigjioze në Evropë në fushën e bujqësisë dhe zhvillimit të qëndrueshëm. Qëllimi i vizitës ishte eksplorimi i mundësive për bashkëpunim në fushën e zhvillimit bujqësor në Shqipëri.
Delegacioni i përbërë nga Herman Snel, Monica Sopov dhe Marianne Van Dorp, të shoqëruar nga përfaqësues të Fondacionit Shqiptaro-Amerikan për Zhvillim (AADF), Enrik Keco dhe Ola Gliozheni, u prit fillimisht në ambientet e Rektoratit nga drejtuesit e universitetit.
Rektori, prof. dr. Lorenc Ekonomi, u uroi mirëseardhjen miqve dhe i njohu ata me historikun dhe profilin e universitetit, si i vetmi institucion i arsimit të lartë në Qarkun e Korçës. Ai vuri në dukje se në vitet e fundit, aktivitetet akademike të universitetit janë orientuar gjithnjë e më shumë drejt zhvillimit rajonal, përmes ofrimit të një game të gjerë programesh në fusha si shkencat natyrore, bujqësore, humane, edukative dhe shëndetësore. Gjithashtu, ai ndau përpjekjet për modernizimin e universitetit dhe projektet në bashkëpunim me AADF.
Gjatë qëndrimit të tyre në Korçë, delegacioni i Wageningen zhvilloi edhe një tryezë të rrumbullakët me stafin e Fakultetit të Bujqësisë.
Prof. as. dr. Besnik Skënderasi, dekan i fakultetit, prezantoi veprimtarinë e tij dhe nënvizoi sfidat me të cilat përballet stafi akademik. Diskutimi përfshiu çështje që lidhen me programet e studimit, angazhimin e studentëve, infrastrukturën e nevojshme për mësimdhënie dhe kërkim shkencor, si dhe lidhjet me biznesin bujqësor lokal.
Vizita u vlerësua si një hap i rëndësishëm drejt krijimit të partneriteteve ndërkombëtare, që synojnë forcimin e kapaciteteve akademike dhe profesionale të universitetit, me fokus në bujqësinë e qëndrueshme dhe zhvillimin e qëndrueshëm rural.
