Zoica Naço është gruaja e hekurt në sytë e mi. Për 4 vite më qëndroi mbi kokë (kujdestare në gjimnaz), shumë herë sakrifikoi për mua por kishte një fjali që më bënte përshtypje, të cilën e thoshte sapo hynte në mësim; “Dua që në fillim të jeni qytetarë të mirë e më pas studentë të mirë. Kemi nevojë për njerëz të mirë”
Ka nxjerrë shumë njerëz në jetë, shumë ndër të cilët i shkruajnë, e kujtojnë, ndërsa unë vendos ta takoj herë pas here.
Zoica Naço është nga ato gratë e heshtura, nuk do të mediatizohet, Zoica Naço është shembulli i gruas qytetare fisnike, që nuk sheh nga vjen, i kujt je, pse je aty, por të shtrin dorën. Shumë e kanë provuar dorën e saj ndihmuese. Unë i përulem per shpirtin e saj bujar por edhe për mençurinë që të qetëson e mbush plot gëzim.
Vlerësoni ata që u kanë ndihmuar kur ishit askushi, vlerësoni Zoicat e jetës, janë ato që e bëjnë këtë qytet më të mirë.
Nga Xhensil Shkembi
