Edhe pse 85-vjeçar, ai vazhdon ende të punojë në torno. Shyqyri Andranji nga Korça është një ndër të paktët tornitorë që i ka mbetur këtij qyteti.
Këtë punë e nisi kur ishte 15 vjeç, e sot mosha nuk e ndal te vazhdojë pasionin e vet.
“Nuk jam penduar, jo, që në ’60-ën e deri në ’93-shin nuk e lëshova tornon nga dora, asnjë ditë pushim. Nga puna në punë, pa pushim fare. Që të bëja një muaj a dy muaj pushim, nuk ndodhte. Dola në pension po s’më rrihej, doja të punoja edhe sot e kësaj dite punoj, edhe pse jam 85 vjeç unë sërish punoj pa syze, kalibrin e njoh pa vështirësi fare”, tha ai.
“Mjeshtri i madh” i dekoruar nga sistemi i dikurshëm në torno, kërkon që këtë punë t’ia lërë trashëgimi edhe djalit të tij.
“Edhe djali e punon tornon, Ben edhe gjëra të imta, edhe qejfi im është ta përvetësojë akoma dhe me shumë edhe pse ai e punon mirë”- thotë ai.
Teknologjia dhe koha ka bërë që tornitorët sot të numërohen me gishtat e dorës. Shyqyriu tregon se kjo ndodh edhe për shkak të vështirësisë që ka kjo punë.
Zanaçinj të rrallë si ky burrë mbajnë gjallë jo vetëm profesionin i cili po zhduket por edhe dashurinë e madhe për punën.
