Mbi 7000 fermerë në qarkun e Korçës kanë aplikuar deri tani në Skemën Kombëtare të Mbështetjes në Bujqësi 2024, për të përfituar financim në zgjerimin e aktivitetit të tyre bujqësor e blegtoral.
Drejtori i Agjencisë Rajonale të Ekstensionit Bujqësor, Korçë, Vullnet Gjolla bëri të ditur, se interesi i fermerëve këtë vit për të përfituar mbështetje nga fondet e qeverisë është i lartë.
Sipas tij, që nga çelja e aplikimeve me 27 mars e deri tani ka një shifër rekord aplikimesh që rezultojnë 7-10% më i lartë se e njëjta periudhë e vitit 2023, nisur edhe nga zgjerimi i mbështetjes që ofron Skema Kombëtare 2024 dhe lehtësitë e aplikimit.
Qarku i Korçës renditet ndër qarqet me numrin më të lartë të aplikimeve këtë vit, në Skemën Kombëtare.
Kryesisht fermerët e këtij qarku kanë aplikuar për të përfituar mbështetje në sektorin e blegtorisë, bimëve mjekësore dhe bletari.
Gjolla tha se, numri më i lartë i fermerëve, shënohet në masën e naftës falas për bujqësinë.
Nga skema e subvencioneve përgjatë vitit 2023 përfituan 65,000 fermerë, ndërsa këtë vit synohet të tejkalohet numri i 70,000 përfituesve, apo 77% e të gjithë fermerëve të regjistruar në vend.
