Petro Nini Luarasi (1865-1911)
Si sot ka ndërruar jetë rilindasi, patrioti dhe arsimtari Petro Nini Luarasi. Lindi në 22 prill 1865, në Luaras të Kolonjës. Në Qestorat ai mësoi të shkruante dhe të lexonte në gjuhën shqipe përkrah mësuesit Koto Hoxhi. Më 1882, ju mësonte fshehurazi nxënësve gjuhën shqipe në Ersekë dhe më vonë hapi shkolla shqipe në fshatrat përreth.Më 1893, Petro Nini Luarasi ishte drejtor i Mësonjëtores së Parë Shqipe pas largimit të Pandeli Sotirit.
Vite më pas ai drejtonte shkollën shqipe në fshatin Negovan dhe shkroi veprën e njohur “Mallkimi i shkronjave shqipe dhe ç’përfolja e shqiptarit“, mbi bazën e të cilës mbrojti të drejtat e popullit shqiptar dhe kulturën kombëtare duke goditur rëndë politikën e Patriakanës Greke dhe politikës aneksuese të xhonturqëve.
Pas burgosjes së tij nga autoritetet turke ai arriti të arratisej dhe të emigronte në Amerikë në vitin 1904, ku mori pjesë gjerësisht në lëvizjen kombëtare. Aty së bashku me patriotë të tjerë ndihmoi në themelimin e shoqërive patriotike “Mall për mëmëdheun” dhe “Pellazgu”.
Pasi u kthye në Shqipëri më 1908, morri pjesë në Kongresin e II-të të Manastirit. Në sajë të aktivitetit të tij të dendur nacional e arsimor, në mbrojtje të gjuhës shqipe dhe të drejtave të shqiptarëve, u helmua në Ersekë më 17 gusht 1911.
