Ka ndërruar jetë At Arthur Liolin, një figurë e shquar e Kishës Ortodokse dhe komunitetit shqiptaro-amerikan.
At Artur Liolin lindi në Nju Jork në vitin 1943 nga prindër shqiptarë me prejardhje nga Boboshtica e Korçës. Ai është cilësuar si njeriu që mishëron atributet e një personi me mjaft reputacion në diasporën shqiptare të SHBA.
Së fundmi ishte kancelar i Kryepeshkopatës Ortodokse Shqiptare me qendër në Boston dhe vlerësohej si një pasardhës i denjë i Fan Nolit, themeluesit të kësaj kishe.
At Arturi ishte i martuar me priftëreshën Margarita dhe kishin tre fëmijë: Evans, Elena dhe Emilia. Studimet e larta i kreu në vitin 1967 për Histori Arti (Mesjeta dhe Bizanti) në Universitetin Princeton, ku u diplomua me (Summa cum laude). Gjithashtu, ka bërë studime në Institutin “Albert Schveitzer” në Zvicër në programin: “Kriza në Qytetërimin Perëndimor,” ku përfshihen një sërë hulumtimesh ekonomike, kulturore, historike dhe filozofike.
At Arturi shkroi mjaft artikuj rreth çështjes shqiptare në gazetën “Dielli,” dhe më tej nëpër revista te ndryshme si “Liria”, Illyria”, “Koha Jonë” etj.
Në vitin 1970 u dorëzua në gradën priftërore në Boston ku i shërbeu popullit shqiptaro-amerikan.
Ai organizoi Bibliotekën e Fan Nolit, pranë Kryekishës së Shën Gjergjit në Boston.
Në vitin 1975 u emërua Kancelar i Peshkopatës Ortodokse Shqiptare të Amerikës.Në vitin 1991 At Arturi bëri udhëtimin më të famshëm të jetës së tij, ku meshoi në 22 qytete të Shqipërisë. Ka udhëtuar në Shqipëri edhe dy herë të tjera për të qartësuar pozicionin e kolonisë amerikane në çështjen e Kishës Ortodokse Autoqefale dhe marrëdhëniet delikate me popujt fqinjë.
