Një foshnje e porsalindur është gjetur e braktisur këtë të mërkurë në bodrumin e një pallati në Tiranë. I porsalinduri u gjet në këtë bodrum, në zonën e Yzberishtit. Gazetari i Klan News, Besar Bajraktaraj raporton se ka qenë një banor i zonës që ka dëgjuar të qarat dhe ka njoftuar policinë.
Foshnja mësohet se u gjet i mbështjellë me disa batanije. Ai u dërgua me urgjencë në spital dhe aktualisht ndodhet në gjendje të stabilizuar shëndetësore. Aktualisht vijojnë hetimet për të zbuluar se kush e ka braktisur beben.
“Në bodrumin e një pallati në Yzberisht, është gjetur e braktisur një foshnje e sapolindur. Shërbimet e Policisë i kanë ofruar menjëherë ndihmën e parë foshnjes, e cila është transportuar me automjetin e Policisë, së bashku me stafin mjekësor, në spital”, tha policia në një njoftim për mediat.
