Ditën e sotme gjatë kontrollit që kanë bërë specialistët e krimeve ekonomike-financiare në lagjen nr. 18 në qytetin e Korçës, kanë gjetur në një biznes të vogël mallra që shiteshin pa pullën fiskale.
Menjëherë është bërë sekuestrimi i mallrave dhe ka nisur procedimi penal ndaj shtetasit që i shiste ato.
Njoftimi i policisë;
DVP Korçë/Procedohet në gjendje të lirë 1 shtetas për veprën penale të shitjes së mallrave pa pullë fiskale
Specialistët për Hetimin e Krimeve Ekonomiko-Financiare të DVP Korçë referuan materialet në Prokurori ku filloi procedimi penal në gjendje të lirë për shtetasin N. S., banues në Korçë, pasi në lagjen nr. 18, Korçë, gjatë kontrollit të ushtruar në subjektin e tij u gjet një sasi e konsiderueshme pijesh alkoolike (verë, liker, raki) dhe alkooli ushqimor, pa pullën fiskale, një pjesë e konsiderueshme e tyre edhe pa etiketa.
Gjithashtu, u gjetën pako me etiketa ngjitëse me logon e subjektit, pa data prodhimi, të cilat vendoseshin në paketimet e produkteve të pacertifikuara nga organet përkatëse. Sasia e pijeve dhe etiketat u sekuestruan në cilësinë e provës materiale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
