Teksa pensionistët korçarë po ndajnë lekët për drutë e dimrit dhe mishin e vitit të ri duke hasur vështirësi të mëdha, një lajm i mirë vjen, qeveria do ndajë 50 mijë lek të vjetra nga e hëna si shpërblim për ta.
Ministria e Financave konfirmon se shpërndarja nis nga e hëna së bashku me pensionet e muajit dhjetor.
Këshilli i Ministrave miratoi vendimin për shpërblimin e pensionistëve dhe personave të tjerë që përfitojnë trajtime financiare me bonusin e fundvitit, në masën 5 mijë lekë, me një fond total prej 3.5 miliardë lekësh.
Shpërblimi mund të tërhiqet nga përfituesit edhe pas festave të fundvitit.
Ky është bonusi i dytë që jepet brenda këtij viti, pas atij të akorduar në muajin prill, nga i cili do të përfitojnë rreth 700 mijë pensionistë, por edhe kategori të tjera, që përfitojnë trajtime financiare.
Në tre vitet e fundit, për indeksimin e pensioneve janë alokuar 25 miliardë lekë, të cilat me buxhetin e parashikuar për vitin e ardhshëm arrijnë në afro 30 miliardë lekë dhe me efekt të përhershëm në buxhetin e shtetit.
