Partizani ka fituar përballë Skënderbeut, në ndeshjen e vlefshme për javën e 34-të të “Abissnet Superiore”. Sfida që u zhvillua në stadiumin “Arena e Demave” përfundoi me rezultatin 1-0 në favor të vendasve. Ishte Alfred Mensah ai që i dha fitoren të tijëve, me golin e shënuar në minutën e 84’. Pas kësaj sfide, për mikrofonat e MCN TV foli trajneri i Skënderbeut, Ivan Gvozdenovic.
“Mendimi im është që sot ishte një ndeshje për barazim. Nuk them që Partizani meritonte fitoren, por i uroj për këtë fitore. Pjesa e parë ishte mirë, por në 20 minutat e fundit të ndeshjes Partizani bëri presion. Ne nuk reaguam mirë. Kishim shans të mirë me Rashicën për të shënuar, por ky është futbolli. Nuk i pashë rezultatet e tjera pas ndeshjes. Gjithçka është e hapur për Final 4. Vjen Laçi shumë shpejt dhe më pas kundër Vllaznisë në Shkodër. Do shohim javë pas jave.”- tha fillimisht Gvozdenovic.
“Unë e thashë që në minutat e fundit kishim problem topat e gjatë të Partizanit. Ata krijuan me një pasim, me një aksion të bukur, por kjo është pjesë e futbollit. Mund të reagonim më mirë te momenti i golit. Jemi mërzitur, por për mua kjo ishte ndeshje për barazim. Edhe me 1 pikë do ishim të kënaqur, por uroj Partizanin për fitoren. Jemi në lojë për Final 4, do të luftojmë fort deri në fund. Kemi rrugë për Korçë. Të mërkurën kemi Laçin dhe duhet të përgatitemi mirë dhe do të luftojmë deri në fund.”- tha më tej trajneri i Skënderbeut.
Ivan ishte një nga lojtarët që ju mbajti përpara në sulm, pse e zëvendësuat?
“Ishte i lodhur edhe pse bëri një lojë shumë të mirë në ajër dhe vrapoi shumë. Ishte lodhur dhe unë mendova ta zëvendësoja. Kjo ishte arsyeja.”
