Poli i Dijes është një hapësirë universitare që po ndërtohet me intensitet në qytetin e Korçës. E ndodhur në zonën e ish-senatoriumit, kjo godinë moderne kap një sipërfaqe ndërtimore prej rreth 9500 m2, e cila do të shërbejë për studentët, duke ofruar ambjente bashkëkohore për zhvillimin e procesit akademik e kërkimor.
Investimi prej rreth 400 milionë lekësh është duke u kryer nga Fondi Shqiptar i Zhvillimit, ndërsa sëbashku me godinën e re, po punohet edhe për kthimin në identitet të ish-senatoriumit, një godinë historike e dhuruar nga filantropi Thoma Turtulli për Korçën.
Është hera e parë që në qytetin e Korçës ndërtohet një godinë e tillë e cila sipas drejtuesit të punimeve është e shkrirë me mjedisin.
Poli i Dijes pritet të jetë i përfunduar me të gjithë elementët e vet në fund të këtij viti.
