Sot pata një bisedë që më ngeli gjatë në mendje. Një vajzë e vogël, në klasën e pestë, që jeton pranë shtëpisë sime, po dilte për një shëtitje në rrugë. Si çdo fëmijë në prag të vitit të ri shkollor, mendova t’i bëj një pyetje të zakonshme: “A je bërë gati për shkollë?”
Kjo pyetje më riktheu pas në kohë, në ditët kur unë përgatitesha për shkollë. Kujtoj me nostalgji momentet kur blinim rroba të reja, gëzoheshim për t’i treguar shoqeve se çfarë kishim marrë, blinim mbulesa të bukura për librat, dhe numëronim stilolapsat, lapsat e reja. Ishte një emocion i madh. Gjithçka rrotullohej rreth shkollës, mësimeve dhe përgatitjes për atë vit të ri akademik.
Mirëpo, përgjigja e saj më la pa fjalë. “Po, po. Gati jam. Ja, thonjtë do bëj sot dhe jam super OK. Veshjet i kam zgjedhur, bleva një Gucci dje. 200 euro. Njësoj si një shoqe tjetër.”
Në atë moment, mbeta e shokuar. Asnjë fjalë për librat, as për mësuesen, as për emocionin e ditës së parë të shkollës. Mu kujtuan ditët kur ne kursenim para për të blerë lule për mësuesen, kur bëheshim gati me përkushtim për të dhënë një fillim të bukur vitit të ri shkollor.
Ndërsa sot, duket se përgatitjet kanë marrë një tjetër drejtim. Fokusimi është zhvendosur nga librat dhe edukimi, te dukja e jashtme, markat e shtrenjta dhe konkurrenca mes shoqeve për të pasur veshjet më të reja e më luksoze.
Çfarë po ndodh me fëmijët e sotëm? A jemi në një shoqëri që i shtyn ata të përqendrohen më shumë te pamja sesa te vlerat e edukimit? A është ky ndikimi i rrjeteve sociale dhe konsumizmit që i bën të fokusohen më shumë te moda dhe dukja, sesa te dituria dhe përparimi?
Një pyetje që duhet t’i bëjmë vetes si prindër dhe edukatorë është se cilat janë vlerat që po u transmetojmë fëmijëve tanë? A duhet të jetë më e rëndësishme se çfarë thonë shoqet për veshjet e tyre, apo emocionet që sjell një vit i ri shkollor dhe pasioni për të mësuar diçka të re?
Kjo histori, ndoshta e thjeshtë për disa, është një reflektim për ne të gjithë mbi ndryshimet që po ndodhin në shoqëri dhe si mund të ndikojmë që të rikthejmë vëmendjen te vlerat themelore të edukimit.
