Eni Zake, rikandidon për deputete në Qarkun Korçë, falënderon mbështetësit dhe kërkon besimin për të vazhduar progresin
Eni Zake, pjesë e listës së hapur të Partisë Socialiste për Qarkun Korçë në zgjedhjet e 11 majit, ka shprehur falenderimet e saj të sinqerta për mundësinë dhe besimin e dhënë për të rikandiduar si deputete. Ajo e cilësoi veten pjesë të ekipit fitues të Qarkut Korçë dhe shprehu mirënjohje të thellë për Kryetarin e Partisë Socialiste, Edi Rama, Kryesinë e Partisë Socialiste dhe drejtuesin politik të qarkut, Niko Peleshi.
Në mesazhin e saj, Zake vlerësoi përkushtimin dhe përgjegjësinë që ka pasur gjatë katër viteve të kaluara për të përfaqësuar dhe kontribuar në zhvillimin e kushteve të jetesës për çdo grupmoshë dhe kategori sociale. Ajo theksoi se misioni i saj është realizuar me përkushtim dhe integritet, duke falenderuar gjithashtu mbështetësit për besimin që i dhanë.
Zake theksoi se mbështetja e çdo socialisti dhe të gjithë anëtarëve të Partisë Socialiste është e çmuar dhe se puna dhe arritjet e saj janë dëshmi e lidhjes së fortë mes besimit të qytetarëve dhe realizimeve të mundshme. Ajo kërkoi sërish besimin dhe mbështetjen për të vazhduar me përparimin e Qarkut Korçë dhe Shqipërisë, duke theksuar se zhvillimi i mëtejshëm është i domosdoshëm për të siguruar një të ardhme më të mirë për qytetarët.
