Qarku i Korçës vazhdon të mbetet në grupin e rajoneve me pagat më të ulëta në të gjithë vendin, ku shumica e sektorëve privatë ofrojnë paga që luhaten vetëm ndërmjet 45 mijë dhe 60 mijë lekëve në muaj, sipas të dhënave më të fundit rajonale të publikuara nga INSTAT për vitin 2024.
Hendeku mes sektorit publik dhe privat në Korçë
Në qarkun e Korçës, ashtu si edhe në Berat e Elbasan, vihet re një mungesë e sektorëve privatë me produktivitet të lartë, çka bën që diferencat mes aktiviteteve ekonomike të jenë relativisht të vogla. Ndërkohë, administrata publike, arsimi dhe shëndetësia paguajnë dukshëm më mirë se pjesa tjetër e ekonomisë vendore, me paga që arrijnë në 80–85 mijë lekë në muaj, duke krijuar një hendek të madh ndaj sektorëve të bujqësisë, tregtisë dhe industrisë.
Tirana kryeson, ndërsa periferia mbetet prapa
Në shkallë kombëtare, Tirana vijon të ketë avantazhin më të madh në nivelin e pagave, veçanërisht në fushat e teknologjisë, financave dhe shërbimeve profesionale, ku paga mesatare i kalon 120 mijë lekë në muaj. Në të kundërt, në shumicën e qarqeve të tjera, paga për të njëjtat veprimtari qëndron në nivelet 45–60 mijë lekë. Pagat më të ulëta në shkallë vendi regjistrohen në Kukës dhe Dibër, ku në bujqësi pagat zbresin deri pranë 40 mijë deri 48 mijë lekëve, ndërsa Korça përfshihet së bashku me Beratin e Elbasanin në zonën me performancë të dobët ekonomike.
Foto ilustruese.
