Agjencia Shtetërore e Kadastrës (ASHK) i është drejtuar Strukturës së Posaçme Antikorrupsion (SPAK) në vitin 2025 me dokumentacionin përkatës për pronën në Palasë, ku lindi konflikti i armatosur mes biznesmenëve Luan Muça dhe Vasil Bedinaj, pas dyshimeve të arsyeshme për falsifikim të titullit të pronësisë.
Sqarimi i ASHK-së për lejet dhe titujt e pronësisë
Në një reagim zyrtar, ASHK ka sqaruar se subjekti “Delta” sh.a., në pronësi të Luan Muçës, ka depozituar gjatë viteve 2019, 2020 dhe 2021 dokumentacion ligjor për disa tituj pronësie të fituar përmes kontratave të shitblerjes. Origjina e këtyre titujve lidhet me vendime të ish-komisioneve të kthimit të pronave, vendime gjykate dhe AMTP. Më datë 24 korrik 2024, për këtë subjekt është regjistruar leja e ndërtimit për resortin “Delta Falaise resort & village, zona 1”, e cila sipas kadastrës është e vetmja leje e regjistruar deri më sot lidhur me këtë çështje.
Dyshimet për falsifikim dhe kalimi i dosjes në SPAK
Sa i përket pretendimeve të palës tjetër të përfshirë në konflikt, ASHK bën me dije se nuk është paraqitur kërkesë dhe nuk është lëshuar vërtetim pronësie në emër të biznesmenit Vasil Bedinaj. Megjithatë, në korrik të vitit 2024 është lëshuar një vërtetim pronësie në emër të një individi tjetër, mbi bazën e një vendimi të ish-Komisionit të Kthimit dhe Kompensimit të Pronave. Gjatë verifikimeve administrative, institucioni ka ngritur dyshime për falsifikim të mundshëm të këtij titulli dhe ia ka përcjellë materialet SPAK-ut për hetim të mëtejshëm. ASHK sqaron gjithashtu se Zona Kadastrale nr. 1739, ku përfshihet hapësira mes Drimadhës dhe Palasës, pritet të përfundojë procesin e regjistrimit fillestar brenda vitit 2027.
