Në prag të sezonit turistik, kanë nisur përgatitjet për pritjen e vizitorëve në monumentet e kulturës dhe sitet arkeologjike në vend. Një ndër destinacionet më të vizituara, veçanërisht nga turistët e huaj, mbetet Tuma e Kamenicës – një monument kulture i kategorisë së parë dhe njëherazi muzeu i vetëm natyror dhe më i madhi i këtij lloji në Shqipëri.
Arkeologu Florenc Cenolli bëri të ditur se janë kryer ndërhyrje mirëmbajtjeje dhe gjithçka është gati për hapjen zyrtare të sezonit.
“Interesi më i lartë për të vizituar këtë Tumë ka qenë nga turistët e huaj,” u shpreh Cenolli.
Tuma e Kamenicës ndodhet rreth 15 kilometra larg qytetit të Korçës. Ajo është zbuluar rreth 70 vjet më parë dhe përfaqëson një ndër zbulimet më të rëndësishme arkeologjike në vend. Në këtë sit janë evidentuar rreth 400 varre, skelete kockore si dhe mbi 3500 objekte arkeologjike, që ofrojnë një pasqyrë të qartë të jetës, zakoneve dhe besimeve të komuniteteve të lashta shqiptare.
Me fillimin e sezonit, Tuma e Kamenicës pritet të mirëpresë një numër të lartë vizitorësh, duke vijuar të jetë një pikë kyçe për turizmin kulturor në juglindje të vendit.
