Pas një rrugëtimi 6-mujor që përfshiu mbi 450 nxënës nga shkollat e mesme dhe 9-vjeçare të qytetit të Korçës, këtë fundjavë u zhvillua me sukses Finalja e Madhe e ICT Club, një nismë që synon të nxisë mendimin kritik, zgjidhjet inovative dhe dashurinë për teknologjinë te të rinjtë.
Eventi u mbajt në bregdetin e Durrësit, ku 90 finalistë patën mundësinë të prezantojnë projektet e tyre përpara një jurie profesionale. Finalistët dëshmuan përgatitjen, kreativitetin dhe vizionin e tyre, duke treguar se të rinjtë e Korçës janë të gatshëm të përballen me sfidat e së ardhmes përmes dijes dhe teknologjisë.
Fituesit e çmimeve të para në tre kategori ishin:
“Sera e Jetës” nga grupi AstroWave – Shkolla “Omiros” (klasat 6-7)
“Roveri i Mbijetesës” nga grupi Hack to Survive – Shkolla “Sotir Gurra” (klasat 8-9)
“Droni Farmaceutik” nga grupi Calculatit Victory – Shkolla Profesionale “TIK”
Në këtë aktivitet u nderua edhe mësuesi Jani Jorgaqi me një Certifikatë Vlerësimi, për kontributin e tij të çmuar dhe qasjen novatore në edukimin e të rinjve në fushën e teknologjisë.
Bashkia Korçë dhe Korca Innovation Hub riafirmuan mbështetjen e tyre për nisma që fuqizojnë të rinjtë, promovojnë arsimin në fushat STEM dhe nxisin zhvillimin e ideve me ndikim pozitiv në komunitet.
Organizatorët falënderuan të gjithë mentorët, anëtarët e jurisë dhe partnerët për bashkëpunimin dhe përkushtimin, si dhe për të gjithë të rinjtë që sollën pasion, përkushtim dhe vizion në këtë garë inovative.
